ଭୁବନେଶ୍ୱର (୯ ଜୁଲାଇ): ୬ ଦଫା ଦାବି ନେଇ ଓଡ଼ିଶା ଡ୍ରାଇଭର ମହାସଂଘ ଚାଲାଇଥିବା "ଷ୍ଟିୟରିଂ ଛାଡ଼ ଆନ୍ଦୋଳନ" ଦ୍ବିତୀୟ ଦିନରେ ପହଞ୍ଚିଛି। ଗତକାଲି ସରକାର ସହ ବୈଠକ ବିଫଳ ହେବା ପରେ ମହାସଂଘ ଲିଖିତ ପ୍ରତିଶ୍ରୁତି ଚାହିଁଥିଲେ, କିନ୍ତୁ ସେହି ପ୍ରତିଶ୍ରୁତି ମିଳିନଥିବାରୁ ଆନ୍ଦୋଳନ ଜାରି ରହିଛି।
ରାଜ୍ୟରେ ବିପରୀତ ପ୍ରଭାବ:
- ରାଜ୍ୟ ଜୁଡ଼ା ଯାତ୍ରୀ ଓ ସାମଗ୍ରୀ ପରିବହନ ଠପ୍।
- ତେଲ ଟାଙ୍କି ଖାଲି ହେଉଛି – ପେଟ୍ରୋଲ୍ ଓ ଡିଜେଲ୍ ମିଳିବା ନିମ୍ନସ୍ଥ।
- ପାରାଦୀପ, ବାଲେଶ୍ୱର, ଝାରସୁଗୁଡ଼ା ଡିପୋରୁ ତେଲ ପରିବହନ ବନ୍ଦ।
ଉତ୍କଳ ପେଟ୍ରୋଲିୟମ୍ ଡିଲର୍ ଅସୋସିଏସନ ସଭାପତି ସଞ୍ଜୟ ଲାଠ୍ ଆଗାମୀ ସକାଳ ଭିତରେ ତେଲ ପରିବହନ ଚାଲୁ ନହେଲେ ରାଜ୍ୟର ଅନେକ ଟାଙ୍କିରେ ତେଲ ସଂପୂର୍ଣ୍ଣ ଶେଷ ହେବ ବୋଲି ଚେତାବନୀ ଦେଇଛନ୍ତି।
ଅନ୍ୟପକ୍ଷରେ ଓଡ଼ିଶା ଡ୍ରାଇଭର ମହାସଂଘର ଖୋର୍ଦ୍ଧା ଜିଲ୍ଲା ସମ୍ପାଦକ ସୁରେଶ କୁମାର ପ୍ରଧାନ କହିଛନ୍ତି ଯେ ଗତକାଲି ୬ ଦଫା ଦାବି ନେଇ ପରିବହନ ମନ୍ତ୍ରୀଙ୍କ ସହିତ ସକରାତ୍ମକ ଆଲୋଚନା ହୋଇଥିଲା। ମନ୍ତ୍ରୀ ଯେଉଁ କଥା କହିଲେ ସେଥିରେ ଆମେ ରାଜି ଥିଲୁ। ଓଡ଼ିଶା ମୋଟର ଟ୍ରାନ୍ସପୋର୍ଟ ଡ୍ରାଇଭର ଓ ୱାର୍କର ୱେଲ୍ଫେୟାର୍ ବୋର୍ଡ ବୈଠକରେ ଆଲୋଚନା କରାଯାଇ ନ୍ୟାଯ୍ୟ ଦାବିଗୁଡ଼ିକ ପୂରଣ କରାଯିବ। ମନ୍ତ୍ରୀ ତାଙ୍କ ପ୍ରତିଶ୍ରୁତିକୁ ଲିଖିତ ଆକାରରେ ଦେବାକୁ ମହାସଂଘର ପ୍ରତିନିଧି ଅଡ଼ି ବସିଥିଲେ। କିନ୍ତୁ ମନ୍ତ୍ରୀ ଲିଖିତ ପ୍ରତିଶ୍ରୁତି ଦେଲେ ନାହିଁ। ଯାହାଦ୍ବାରା ସରକାରଙ୍କ କଥାକୁ ଆମେ ବିଶ୍ବାସ କଲୁ ନାହିଁ। ଲିଖିତ ପ୍ରତିଶ୍ରୁତି ନ ଦେବା ଯାଏଁ ଆନ୍ଦୋଳନ ଚାଲୁ ରହିବ ବୋଲି ଶ୍ରୀ ପ୍ରଧାନ କହିଛନ୍ତି।